A Casa de Galicia en Madrid acolleu esta tarde a presentación da terceira edición do Camiño de Santiago dos Peregrinos de Marte, unha iniciativa impulsada pola asociación sen ánimo de lucro Los Peregrinos de Marte que permite a familias con fillos con discapacidade intelectual vivir xuntas a experiencia da peregrinación a Santiago de Compostela.
O acto estivo presidido polo director da Casa de Galicia en Madrid, Luis E. Ramos, e contou coa participación de representantes da asociación Peregrinos de Marte, da Asociación de Médicos Galegos (ASOMEGA), de DisCamino e das entidades colaboradoras que fan posible o desenvolvemento deste proxecto.

Durante a súa intervención, Luis E. Ramos lembrou que o proxecto dos Peregrinos de Marte naceu precisamente na Casa de Galicia en Madrid, un feito que, segundo sinalou, constitúe un motivo de orgullo para a institución. Neste sentido, agradeceu o compromiso das persoas e entidades que impulsan a iniciativa e destacou especialmente o labor desenvolvido pola asociación Peregrinos de Marte, por ASOMEGA e por DisCamino para facer realidade unha experiencia que combina deporte, convivencia, esforzo compartido e inclusión.
Luis E. Ramos recoñeceu tamén a colaboración das entidades patrocinadoras e colaboradoras, cuxa implicación resulta fundamental para garantir a continuidade dun proxecto que ofrece a numerosas familias a oportunidade de compartir unha experiencia transformadora a través do Camiño de Santiago.

Durante a súa intervención, o director puxo en valor a capacidade do Camiño para xerar espazos de encontro, superación persoal e integración, ao tempo que animou aos participantes a gozar dunha experiencia que cada ano reúne milleiros de persoas chegadas de todo o mundo.
Neste contexto, lembrou o extraordinario momento que vive a ruta xacobea, facendo referencia aos últimos datos de peregrinación rexistrados pola Oficina do Peregrino, que reflicten a constante proxección internacional do Camiño de Santiago e a súa capacidade para atraer visitantes de procedencias moi diversas.

A terceira edición do Camiño dos Peregrinos de Marte reafirma o compromiso das entidades organizadoras coa inclusión e coa igualdade de oportunidades, empregando a experiencia xacobea como ferramenta de participación, convivencia e desenvolvemento persoal para as persoas con discapacidade intelectual e as súas familias.
Con iniciativas como esta, a Casa de Galicia en Madrid continúa apoiando proxectos que contribúen á difusión dos valores do Camiño de Santiago e ao fortalecemento da súa dimensión humana, social e integradora.